| |
For
di 1 di ougùstùs 2005 ta posibel pa pidi hues duna
un disposishon den kasonan ku ta trata un kombenio laboral, un kombenio
di agentür ò un kontrato kolektivo di trabou. Esaki
ta nifika ku por entama un kaso hudisial mas barata awor den kasonan
asina. Pa kasonan kaminda ta duna un disposihon por yama partido
pa medio di un karta registrá. Asina ta spar gastunan envolví
ku yamamentu dor di un deurwaarder. Un otro redukshon di gastu ta
trata griffierechten. Pa e kasonan ariba menshoná, esaki
ta monta f 50,- si e trahadó ò e agente ta entamá
e kaso. Esaki ta nifika ku trahadó por plantia nan konflikto
na hues pa menos ku shen florin. Disposishon hudisial por ta ehekutabel
di imediato tambe. Esei ta nifika ku un eventual apelashon no ta
suspendé e veredikto inisial i tambe ku por eksihí
un indemnisashon di daño i perhuisio mesora.
Si un persona
ke asistensia di un abogado, naturalmente gastunan lo subi konsiderablemente.
No ta obligá pa hasi uzo di un abogado. Tin organisashon
di trahadó ku den sierto kaso ta sòru pa asistensia
hurídiko pa nan mièmbronan. Fuera di esei ta eksistí
tambe e areglo di asistensia hurídiko grátis (krb):
• Trahadonan ku un entrada anual di menos ku f 12.000,- por
bini na remarke pa asistensia hurídiko grátis.
• Trahadonan ku un entrada anual entre f 12.000,- i f 22.500,-
por bini na remarke pa asistensia hurídiko, basta ku nan
paga un kontribushon na kaha di Gobièrnu ku ta varia di f
50,- (pa un entrada anual entre 12 i 15 mil florin) te ku f 350,-
(entrada anual entre 20 i 22,5 mil florin).
• Den kasonan eksepshonal trahadó ku entrada anual
riba 22,5 mil florin por haña asistensia hurídiko
tòg, basta ku situashon ekonómiko di trahadó
ta di tal índole, ku ounke su entrada (segun impuesto) ta
surpasá e montante preskribí, no por konsider'e den
posishon di por paga gastunan di un abogado. Den kasonan asina Direktorado
di Labor ta eksigí si e kontribushon personal máksimo
di f 350,-.
Gobièrnu
ta konsidera disposishon hudisial komo un alternativa pa un korte
laboral o un kamara laboral. Na momentu di introdukshon di fleksibilisashon
di legislashon laboral na aña 2000 a primintí di instalá
un korte laboral pa fasilitá akseso na hues pa trahadó.
A realisá e meta aki ku e lei aktual sin ku tabata nesesario
pa institui un órgano separá. Esaki ta mas efèktivo
i mas barata.
|
