12. Fèrlòf di embaraso i parto

For di dia 29 Aprel 1999 ta na vigor ku e empleada konserní konforme e art 1614ca di Kódigo Sivil mester haña liber pa motibu di embaraso i parto manteniendo su salario kompleto.
E asina yama “Fèrlòf di embaraso i parto”.

E intenshon di e fèrlòf aki ta pa protehá i garantisá seguridat, salú i bienestar di e empleada i e yiu ku (mester) nase.

Ku e areglo aki ta eksistí den Antia un mínimo legal di fèrlòf di embaraso i parto pa tur empleada sin tene kuenta ku altura di nan entrada.

E stipulashon den e dekreto di Seguro pa malesa ta komplementá esun di Kódigo Sivil.
Si e empleada ta sigurá via di S.V.B., 80% di su salario lo wòrdu kubrí dor di S.V.B. durante e periodo di fèrlòf.

DURASHON DI E FÈRLÒF.

E empleada tin derecho riba fèrlòf kompletamente pagá durante minimal 4 i maksimal 6 siman promé ku e supuesto fecha di parto (fèrlòf di embaraso) i minimal 6 o maksimal 8 siman despues di parto (fèrlòf di parto).
Na momentu ku e fèrlòf di embaraso ta bai kuminsá (e empleada mes por skohe e momentu), mester determiná kuantu siman esaki ta kai promé ku e supuesto fecha di parto(e fecha aki mester wòrdu stipulá dor di e dòkter di kas, ginekólogo o spesialista).
Si esaki ta kai 6 siman promé ku e fecha di parto, e empleada tin e ora ey derecho riba 6 siman di fèrlòf di parto.
Den kaso di 5 siman fèrlòf di embaraso e empleada tin derecho riba 7 siman di fèrlof di parto.
Den kaso di 4 siman e tin derecho riba 8 siman di fèrlòf di parto.
E empleada no por tuma fèrlòf di embaraso pa un periodo menos ku 4 siman ya ku e fèrlòf di parto por dura maksimal 8 siman.

Parto promé ku tempu o parto despues di tempu:

Si e durashon real di fèrlòf di embaraso resultá mas kòrtiko o mas largu ku e durashon plania debi ku e parto a tuma lugá mas promé o mas lat ku e fecha stipulá, esaki lo tin influensha riba e durashon di fèrlòf di parto.
E momentu di parto de fakto por hasi finalmente durashon di fèrlòf di embaraso i fèrlòf di parto konhuntamente mas largu o mas kòrtiko ku 12 siman.

EHÈMPEL 1 (Parto promé ku tempu, menos ku 12 siman fèrlòf)

- Supuesto fecha di parto: 16 di febrüari
- Eskoho di e empleada fèrlòf di embaraso 4 siman promé: 19 yanüari
- Fecha real di parto: 8 febrüari
- Derecho riba 8 siman fèrlòf di parto for di dia 8 febrüari fèrlòf te 5 aprel.

Splikashon: E empleada a disidí di tuma 4 siman fèrlòf di embaraso. E parto ta tuma luga un siman promé. E trahadó tin derecho riba 8 siman fèrlòf di parto. E siman of dianan di fèrlòf di embaraso no usa den a kaso aki no por pasa pa fèrlòf di parto pasobra fèrlòf di parto no mag dura mas largu ku 8 siman. Pa e motibu akí e periodo total ta 11 siman

EHÈMPEL 2 (Parto mas tempran, sin embargo 12 siman fèrlòf)

- Supuesto fecha di parto: 1 di yüli
- Eskoho di e empleada fèrlòf di embaraso 5 siman promé : 27 mei
- Fecha real di parto: 24 yüni
- Derecho riba 8 siman fèrlòf di parto for di dia 24 yüni te 19 ougùstùs.

Splikashon: E empleada a disidí di tuma 5 siman fèrlòf di embaraso; e fèrlòf di parto ta e or’ ei 7 siman. Pero e parto ta tuma luga un siman promé. E trahadó tin den e kaso aki ainda derecho riba 8 siman fèrlòf di parto pasobra fèrlòf di embaraso i parto konhuntamente mag di dura maksimal 12 siman

EHÈMPEL 3 (Parto mas lat ku tempu, mas ku 12 siman fèrlòf)

- Supuesto fecha di parto: 19 di òktober
- Eskoho di e empleada fèrlòf di embaraso 6 siman promé: 7 sèptèmber
- Fecha real di parto: 27 òktober
- Derecho riba 6 siman fèrlòf di parto for di dia 27 òktober fèrlòf te 8 desèmber.

Splikashon: E empleada a disidí di tuma 6 siman fèrlòf di embaraso. E parto ta tuma luga un siman despues di supuesto fecha di parto. E empleada ta haña pa e motibu akí, a pesar di e durashon di fèrlòf di embaraso (den e kaso aki 7 siman) derecho riba por lo ménos 6 siman fèrlòf di parto. Den e kaso aki e periodo total ta 13 siman

E durashon mínimo di fèrlòf di embaraso i parto ta un derecho di lei obligatorio kual ta nifiká ku no por desviá for di dje na inkumbinensia di e trahadó.
Wèl t’asina ku e doño di trabou huntu ku e trahadó por palabrá periodonan ku durashon mas largu.

RETIRO DURANTE FÈRLÒF DI EMBARASO I DI PARTO

Durante e fèrlòf di embaraso i parto un doño di trabou no por terminá e relashon di trabou ku e trahadó (Wak e foyeto “Doño di trabou i retiru i “Trahado i Retiru”).